*** के हो जीवन ? ***

कसैको लागि उजाड मरुभूमि हो जीवन ।
कसैको लागि हराभरा बसुन्धरा हो जीवन ।
कसैको लागि दु:ख र आँशुको तरेली हो जीवन ।
कसैको लागि खुशी र हाँसोको अविरलता हो जीवन ।

वैभवताले चुलिएका हरुका लागि ,
अनुपम स्वर्ग भएको छ जीवन ।
पलपल मरिरहेका हरुका लागि ,
रौरव नर्क तुल्य भएको छ जीवन ।

गाँस,बास र कपासले पिल्सेका हरुलाई ,
उचाली नसक्नु भारी हो जीवन ।
दुध चुसेर भात ओकल्नेहरुका लागि ,
कहिल्यै नरित्तिने भण्डार हो जीवन ।

आलिसान महलमा राजगर्ने हरुकालागि,
निरन्तर खित्का छोडाइ हो जीवन ।
झुपडीमा बसिरहेका हरुका लागि ,
पल पलको असह्य दुखाइ हो जीवन ।
मात्तिएर बाँचिरहेका हरुका लागि ,
कहिल्यै नरित्तिने नशा हो जीवन ।
आत्तिएर बाँचिरहेका हरुका लागि ,
प्रलयँकारी महाभूकम्प हो जीवन ।

प्रेम र मिलनमा रमिरहेका हरुकालागि,
असिमित रमाइलो र आनन्द हो जीवन ।
वियोग-व्यथाले छटपटाएका हरुका लागि ,
पीडैपीडाको विसाल भकारी हो जीवन ।
नियतिले कोल्टे फेरेका हरुका लागि ,
अभावै अभावको हिमचुली हो जीवन ।
पुर्पुरो बलियो हुनेहरुका लागि ,
हीरा र मोतिको सगरमाथा हो जीवन ।

मदहोशिमा लट्ठीरहेका हरुका लागि ,
चरम सन्तुष्टिको पराकाष्टा हो जीवन ।
हातमुख जोड्ने समस्या भएका हरुकालागि,
भोक र असन्तुष्टिको अबिजालो हो जीवन ।
वासनाको संसारमा रम्ने हरुकालागी ,
भोग्नु र भोगाइ मात्रै हो जीवन ।
भष्मासूर र नरपिशाच हरुका लागि ,
काँचको खेलौना जस्तै हो जीवन ।

इमान्दारिताले बाँचेका हरुको लागि ,
सच्चरित्रता र नैतिकता हो जीवन ।
बेइमानदारिताले बाँचेका हरुको लागि ,
दुश्चरित्रता र अनैतिकता हो जीवन ।
स्वाभिमानी पूर्वक बाँचेका हरुकालागी,
पौरख र अनवरत संघर्ष हो जीवन ।
लुच्चा र स्वार्थी हरुका लागि ,
फट्याइं र धुर्त्याइं मात्रै हो जीवन ।

देशलाई माया गर्ने हरुका लागि ,
त्याग,तपश्या र बलिदान हो जीवन ।
देशलाई मायाँ नगर्ने हरुका लागि ,
छलकपट र झूठको खेति हो जीवन ।
साधु, महात्मा र महापुरुष हरुका लागि ,
काम,क्रोध,लोभ र मोह बिहीन हो जीवन ।
यसरि अनगिन्ति परिभाषाहरु बोकेको ,
अनमोल र अपरम्पार हो जीवन ।





You may also like it.....

• -भोकको स्वाद ( कविता ) सुधीर ख्वबि ।
• -तिमी छाल, म किनार ( कविता )
• -भो ! म अब गजल लेख्दिन
• -एक हुल ताराहरू
• -सपनाको रंग